LAOAG CITY – Inadmitir ni Mr. Honesto Alog iti Barangay Medina, Dingras, Ilocos Norte a dakkel ti panagbabawi na iti panangbakal-bakal ken panangpaltog na ti anak na a ni Cristorey Alog nupay saanna a natamaan.
Daytoy ket kalpasan a saan nga inted ti anak na ti dawdawaten na a 20 ribo a pisos nga igatang na ti motorsiklo.
Inlawlawag na iti Bombo Radyo Laoag nga awan ti panggep na a mangpatay ti anak na no di ket kayat na laeng a butbutngen.
Inbatad na nga adda ti immuna a 20 ribo a pisos nga inted da kenkuana ngem pinagbaybayad na iti utang da.
Innayon na a ti paltog na a kalibre 38 nga inpataray da laeng nga inlako kenkuana.
Naamoan a kalpasan a nagsango dagiti agama iti kwerpo ti pulisya karaman ti maysa pay a kabsat ti biktima ket naibaga ti maseknan a pinakawan na ti ama na.
Nupay kasta, inbatad ni Police Major Ryan Retotar, ti chief of police iti ili ti Dingras a pilaan da latta ti reklamo nga attempted parricide ti suspek.
Kuna ni Retotar nga itinton piskalya ti mangtingiting no maituloy wenno saan ti ipila da a reklamo.
