LAOAG CITY – Kinontra ni Atty.Jason Perera, Sang Panlungsod member ditoy ciudad ti Laoag ti nagbalin a rakurak ti Philippine National Police nga edited ti video iti pannakaarestar ti kliyente na a maysa a negosyante iti peryaan ditoy ciudad iti kallabes.
Inpetteng na a masapol nga agbalin a naannad ti nailian a pulisya kadagiti iparparuk-at da nga statement.
Kuna na pay a no ibaga da nga edited ti video ket masapol nga adda ti supporting documents da a mangipaneknek iti rakurak da.
Inpalgak na pay nga ad-adda laeng a saan a patpatien ti publiko dagiti kameng ti pulisya no saanda nga agbalin a naannad kadagiti iparparuk-at da nga statement.
Innayon na a maysa a lakay ti mismo a nagvideo idi arestaren dagiti otoridad ti kliyente na.
Mainaig iti daytoy, inpakaammmo ni Perera a napan nakisarita kenkuana ti National Police Commission manipod La Union tapno mangala ti video recordings ken testimonial evidence.
Maipalagip nga immunan nga inlawlawag ni Atty. Perera dagiti ebidensya no apay a nakuna na ken patienna nga inosente ti kliyente na a maysa a negosyante a natiliw iti peryaan ditoy ciudad ti Laoag gapu iti maipagarop a panagikot na ti paltog.
Segun kenkuana, ti kliyente na ket dakkel ti bagina isut gapuna a saan a mabalin nga agisabukel ti paltog gapu ta sigurado a maregreg ken saan nga agplastar, ken ti pay a ti suot na a pantalon ket garterized.
Inpetteng ni Perera a basar pay kadagiti nakasarsarita da nga indibidual iti lugar ket rumrumuar nga adda ti nakasibilyan a nangiyawat ti paltog iti pulis a makita iti video a maipagarop a mangipilpilit nga iggaman daytoy ti suspek.
Gapu iti daytoy, kiniddaw ni Perera a maipadalan iti finger print ti paltog ngem ti nagbalin a sungbat kenkuana ti nailian a pulisya ket saan a mabalin gapu ta finger print da aminen no sadinno nga inawagan ti abogado a sabali mane, banag a kinontra manen daytoy ti abogado.
Inpaganetget ni Perera a no adda ti makumpiskar nga ebidensya iti maysa nga indibidual kas ti paltog ket nasken nga iyadayo a dagus amangan no agawen pay ti suspek, aglalo ket saan da pinosasan a dagus a mangitunda ti peggad kadagiti tattao iti lugar.
Innayon ni Perera a no pudno a kukua ti suspek ti paltog ket nalidem nga isabukel na paylaeng gapu ta adda ti sling bagna nga isu ti mabalin na koma a pangilemmengan.
