LAOAG CITY – Inpakaammo ni P/Col. Frederick Obar, Provincial Director ti Ilocos Norte Police Provincial Office nga awan ti narekobreda a bomba iti uneg ti Mariano Marcos State University – College of Health Sciences iti siudad ti Batac.
Nupay kasta, agtultuloy ti iwaywayat nga inspeksion ti Explosive Ordnance Disposal pakairamanan dagiti dadduma pay a maseknan nga ahensia tapno maipasigurado met laeng ti seguridad ti amin.
Kiniddaw ni P/Col. Obar iti publiko nga agbalin nga alerto kadagiti maiwarwaras nga impormasion tapno maliklikan ti panag-panic dagiti umili.
Inpasingkedna nga amin a pasdek ken pasilidad iti Mariano Marcos State University ket dumalan iti inspeksion tapno maipasigurado a natalged ti panagsubli dagiti estudiante ken mangisursuro iti unibersidad.
Inlawlawagna nga ikarigatan ti Philippine National Police kaduada ti Armed Forces of the Philippines, Philippine Army ken Philippine Navy iti panangkita kadagiti amin a suli iti pagadalan.
Immuna iti daytoy, nakaawat ti bomb threat ti Mariano Marcos State University a maipagarup nga adda ti 11 a naimula a bomba iti aglawlaw iti College of Health Sciences grounds no sadinno a rumrummuar nga adda ti pito a naikabil iti Pharmacy ken Nursing Deparment idinto nga uppat met iti mapapati a naimula a bomba iti Physical Therapy Deparment.
