LAOAG CITY – Naglikudan ni Barangay Chairman Teddy Rosqueta iti Barangay Cali iti ili ti Dingras ti alegasyon a maipagarop nga awan ti ar-aramiden na seknan iti mairekreklamo a piggery farm a kukua dagiti agasawa a da Mr. Elpidio Yapo ken Mrs. Irene Yapo iti metlaeng nadakamat a barangay.
Inpetteng ni Barangay Chairman Rosqueta nga idi naidanun ti reklamo seknan iti nabangsit nga angot nga aggapo iti piggery farm da agasawa ket dagus da nga inaktwaran.
Kuna na a kalpasan ti pannakisarita da kadagiti akinkukua iti piggery farm ken inbalakad da a sapaen da dalusan ken pagtalinaeden da a nadalos ti lugar, ket awanen ti maangot da a nabangsit nga angot.
Segun ken ni Rosqueta, rinugyanen dagiti agasawa a makinbagi iti piggery farm ti agilako kadagiti taraken da a baboy.
Innayon na nga inkari dagiti agasawa nga ilako da aminen dagiti taraken da a baboy kalpasan na ket agbiruk da ti sabali a pagpatakderan da ti piggery farm.
Mainaig iti daytoy, dikamat ti kapitan a ti laengen pagtaengan da Mr. Glenn Parado nga adda iti pagserkan iti agturong iti piggery farm dagiti agasawa a Yapo ti maipagarop a makaang-angot iti nabangsit. Kabayatanna, inpaiman ni Mr. Ferdie Felipe manipod iti Sanidad ti nasao nga isyu iti Municipal Environment and Natural Resources (MENRO) no sadinno a ti nasao nga opisina metten ti mangidanun daytoy a banag iti Regional Office gapu ta isu iti nangted ti lisensya iti panagoperar ti nasao a piggery farm.
