LAOAG CITY – In-inuten a malawlawagan ti kaso mainaig iti pannakaidisso lattan ti kaipasngay a maladaga a lalaki iti sango ti maysa a balay partikular iti ayan dagiti tsinelas iti Brgy. 1, San Lorenzo ditoy ciudad ti Laoag.
Basar ken ni Police Lt. Col. Mar Louise Bondoc, ti chief of police ditoy ciudad ti Laoag, adda ti maysa a babai nga inpadalan da ti medical examination da no sadinno a ti nagbalin a resulta ti eksaminasyon ket adda ti pagilasinan a nagpasngay ti maseknan.
Inpakaammo ti opisyal nga iti agdama ket adda ti saannan nga innaganan a babai iti maysa nga ospital para iti pannakaraspa na.
Nupay kasta, kuna ni Bondoc a saan pay a maibaga no ti nasao a babai ti ina ti maladaga.
Inlawlawag ni Bondoc a ti babai ti immuna a nakangngeg nga adda ti agsangsangit a maladaga iti sango ti pagyayanan na a balay ken isuna met laeng ti nagreport iti opisina da.
Kuna ni Bondoc nga idi damo ket addan ti panagdudua da amangan no ti met laeng babai ti akin-anak iti maladaga isut gapuna nga inpa-medical da daytoy.
Segun pay ken ni Bondoc, ipadalan da ti DNA test ti babai ken ti maladaga, ken no positibo nga agina da ket isunto pay laeng ti panangdeterminar da no ania ti rumbeng nga ipila da a reklamo no sadinno nga isudan ti agbalin a complainant.
Innayon na a ti nasao a babai ket naggapo iti Metro Manila ken immay ditoy ciudad ti Laoag gapu iti karelasyon na a kameng ti LGBT a naam-ammo na iti social media.
