LAOAG CITY – Inbutaktak ni Mrs. Marilyn Calison iti Barangay Calayab ditoy ciudad ti Laoag a pasaway ti apoko na a balasitang nga immunan nga inreport na a nagpukaw no sadinno a nabirukan daytoy iti maysa a San Valley Beach Resort kadwa na ni dati a Konsehal Melvin Dela Cuesta ditoy ciudad.
Inpalgak ni Calison nga idi kasangsangpet ti apoko na ditoy ciudad ti Laoag manipod iti Metro Manila ket nagaget gapu ta maaramid na amin a trabaho iti uneg ti balay.
Nupay kasta, kuna ni Calison a sipud nagam-ammo ti apoko na ken ni dela Cuesta ket maipagarop a nagbaliwen ti balasitang kangrunaan na idi inikkan ti dati a konsehal ti cellphone tapno makontak da iti tunggal maysa.
Segun ken ni Calison, nabayag dan nga agga-ammo kada dela Cuesta gapu ta barkada daytoy ti anak na nga isu ti ina ti apoko na a balasitang.
Gapu iti daytoy, saan nga inpagarop ni Calison nga adda ti mabukel a relasyon ti apoko na ken ni dela Cuesta.
Inyistorya na nga idi naduktalan da nga adda ti apoko na ken ni dela Cuesta iti nadakamat a resort ket nagturong da a dagus iti lugar kadwa da dagiti opisyal ti barangay ken kameng ti Philippine National Police.
Inpetteng na nga idi damo ket ilibak ni dela Cuesta a kadwa na ti apoko na ngem adda dagiti nakakita no sadinno nga idi simrek da iti kwarto da ket nakita da ti balasitang.
Inpaganetget ni Calison a no isuna ti agdamag iti apoko na no adda ti relasyon da ket ilibak ti balasitang ngem inadmitir na kadagiti agkaskasera kadakuada.
Mainaig iti daytoy, inadmitir ni Calison nga idi napunwanen gapu iti ar-aramiden ti apoko na ken saanna a kayat nga ited ti cellphone nga inted ni dela Cuesta ket nasipat na ti balasitang. Innayon na nga idi naala dan ti apoko na manipod iti nadakamat a resort ket napagnunumoan da nga agnaed paylaeng iti poder ni Barangay Chairwoman Marvelyn Padayao gapu ta iti dayta a gundaway ket awan dagiti kameng ti Department of Social Welfare and Development sakbay a napalubusan a nagbiyahe ti balasitang a nagsubli iti Metro Manila.
