LAOAG CITY – Agtultuloy ti imbestigasyon ti Philippine National Police mainaig iti pannakaserrek ti Municipal Health Office iti Brgy. 3, San Ildefonso iti ili ti San Nicolas a nakapukawan dagiti sumagmamano a medical items a mapatta-patta nga agbalor ti agarop P846 ribo a pisos.
Daytoy ti inbatad ni Police Capt. Sygman Benigno , ti chief of police iti ili ti San Nicolas.
Kuna na nga iyur-uray da ti resulta ti pannakaeksamen dagiti fingerprints babaen ti Ilocos Norte Forensic Unit iti Ilocos Norte Police Provincial Office.
Inpakaammo ni Benigno nga addan ti pannakikoordinar da kadagiti residente iti asideg ti Municipal Health Office partikular dagiti addaan ti Closed-circuit television a mabalin a makatulong iti panagim-imbestigar da ken tapno makiy.
Innayon na a saan a maibulsa dagiti suspek dagiti apparatus no di ket sigurado nga inlugan da dagitoy.
Kuna pay ni Benigno nga awan ti pagilasinan a napwersa a nalukatan ti ridaw ti Municipal Health Office iti ili ti San Nicolas.
Mainaig iti daytoy, inbatad ni Benigno a karaman kadagiti mapukpukaw ket ti 2 a Microscopes nga agbalor ti P80 ribo a pisos iti tunggal maysa; Maysa a Micro Hematocrit Centrifuge nga agbalor ti P80,000.00; Maysa a Serum Electrolyte Analyzer Machine nga agbalor ti P600,000.00; ken maysa nga AVR nga agbalor ti P6,000.00.
