LAOAG CITY – Umabot iti 1.7 Million ti balor ti nadadael iti pannakauram ti maysa a pagtaengan pakairamanan ti maysa a PUV ken dua a tricycle iti Sitio Camanggaan iti Brgy. Napu iti ili Badoc.
Daytoy ti inpakaamo ni Senior Fire Officer IV Jomel Raval iti Bureau of Fire Protection iti ili ti Badoc.
Segun kenkuana, iti inyuswatda a naan-anay nga imbestigasion namunganay ti uram iti Electrical connection dagiti dua a tricycle .
Inalwlawagna a nag-short dagiti electrical connection nga asideg iti maysa a tanke ti hose a naaramid iti rubber ken naglaon iti gasoline rason no apay nga alisto a nagkayamkam ti uram.
Maipalagip a nauram ti maysa a pagtaengan iti Sitio Camangaan iti Brgy. Napu iti ili ti Badoc ken awan met ti nadangran nga indibidual gapu ta awan ti agnanaed iti nadakamat a pagtaengan.
