LAOAG CITY – Inbatad ni Provincial Jail Warden Benilda Sadian nga inpanda iti bartolina ti Ilocos Norte Provincial Jail (INPJ) ni Medy Laudencia, taga Barangay Suyo, Dingras, Ilocos Norte.
Maipalagip a ni Laudencia ket naglibas idi Agosto 31 ngem natiliw met laeng idi kalman idiay Sitio Tubeg, Pita, Infanta iti probinsya ti Pangasinan babaen ti nagtitipon a pwersa ti Infanta PNP, Alaminos Municipal Police Station, Provincial Mobile Force Company, Mabini Police Station, prison guard ti INPJ ken Ilocos Norte CIDG.
Inlawlawag ni Sadian a naipagagangayen a no adda ti aglibas a balud ken maisubli iti INPJ ket maipan iti bartolina kas paset ti panangdusa da iti inaramid na.
Kuna na a kas dusa ni Laudencia ket saan a mabalin a mapan bisitaen ti pamilya na.
Innayon ni Sadian nga agtalined ni Laudencia iti bartolina agingga iti pannakadengngeg ti kaso na a panagrames intono Oktubre 14 ita a tawen.
Inlawlawag na a gapu iti inaramid ni Laudencia ket mairamraman dagiti pada na a balud a mapawilan a mabisita ken maipadlock da.
Gapu iti daytoy, kuna ni Sadian nga ado dagiti makapungtot ken ni Laudencia.
Inpakaammo ni Sadian nga addan ti insumitir da a report da iti opisina ni Governor Matthew Marcos-Manotoc mainaig iti pannakalibas ni Laudencia.
Segun kenkuana, iyur-uray da ti agbalin a desisyon ti gobernador no ania ti possible nga ipataw na a pannusa kadagiti guwardya iti INPJ, pakairamanan kenkuana kas mangidaulo iti nasao a pagbaludan.
Kabayatanna, inpasingked ni Sadian a ti indiaya da a gunguna a 20 ribo a pisos ket ited da iti Team leader ti nakabiruk ken ni Laudencia idiay Pangasinan.
https://www.bomboradyo.com/laoag/nakalibas-a-balod-iti-inpj-natiliwen-idiay-pangasinan/
