LAOAG CITY – Inpakaammo ti Bangladesh Army ti kaadda ti interim government a mangtarawidwid iti pagilian a Bangladesh.
Daytoy ket kalpasan ti panaglusulos iti pwesto ni Prime Minister Sheikh Hasina ken ti ipapanawna iti pagilian kalpasan ti sumagmamano a lawas a protesta.
Kinuna ni Army chief General Waker-Uz-Zaman a ti interim government ti temporario a mangidaulo iti gobierno agingga nga awan ti mapili a mangidaulo.
Binalakadanna pay dagiti umili nga agtalinaed a kalmado.
Mainaig iti daytoy, maipagarup a nagturong ni Hasina idiay New Delhi India gapu ta rumrumuar nga inkabil dagiti soldado ni Hasina kadwa na ti kabsat na a babai idiay India.
Maipalagip nga umabot iti nasurok a 300 a tattao ti natay gapu iti nalawa a tignay protesta kalpasan a nagusar kadagiti tear gas ken rubber bullets dagiti pulis.
