LAOAG CITY – Nakigtot ni Barangay Chairman Ramon Lopez Jr. iti Barangay Elizabeth, Marcos, Ilocos Norte iti papan panangiyuswat dagiti otoridad ti search operation iti balay na itay bigat.
Nupay kasta, negatibo ti resulta ti naiyuswat a search operation iti balay ti nasao a kapitan.
Inbatad ni Lopez a saanna pulos a ninamnama nga iyuswatan da ti operasyon gapu ta awan ti ammo na a basol na.
Atapen ti kapitan a naiyuswatan ti operasyon gapu ta mabalin nga inramraman da iti napasamak a pannakapaltog a poon ti nakatayan ni Police Corporal Wilbert Rarogal Jr. iti Barangay Santiago iti ili ti Marcos.
Daytoy ket gapu ta nagkukuyog da kada Barangay Chairman Jimmy Pablo iti Barangay Cacafean, Barangay Helen Abrigado iti Barangay Ferdinand ken Barangay Chairman Norma Bayudan iti Barangay Santiago a napan nakimeeting iti balay ti maysa nga agkandidato a para mayor iti nasao nga ili idi napasamak ti pammaltog.
Maipalagip a ti gunman ket inlubbon ni Kapitan Pablo ngem agpapan ita ket saanna a kayat ti agsarita mainaig ti kinatao ti nangpaltog kenni Rarogal.
Napasamak ti pammaltog bayat ti panagawid da kapitan Pablo idinto a ti grupo ni Rarogal ket naggapo da met iti maysa a minatayan iti Barangay Santiago.
Inpasingked ni Lopez nga awan ti pakainaigan ti politika ti nagtataripnong da iti balay ti kandidato a para mayor no di ket maipanggep laeng ti boundary dispute iti ili ti Marcos ken Nueva Era.
Segun ken ni Lopez, naipalaon iti search warrant ti maysa a kalibre 45 a paltog ken maysa nga M16 armalite rifle.
Nagyaman ti nasao a kapitan gapu ta awan ti narekobre dagiti otoridad ken inpasigurado na nga awan ti ik-ikutan na a paltog.
