LAOAG CITY – Inlawlawag ni Barangay Kagawad Bobby Raquiño, ti Barangay 34-A Gabu ditoy siudad ti Laoag a saanna a perperdien ni Barangay Chairwoman Glenda Raquiño iti nasao met laeng a barangay.
Segun ken ni Kagawad Raquiño, saanna a kukuestionaren dagiti ar-aramiden ti Kapitana laketdi saan a maikanniwas kadagiti pagannurotan.
Inbatadna a no adda dagiti iyetnag a desision wenno ipatungpal a programa ti Kapitana ket saan man laeng a maala ti kabibiangda kas opisial ti barangay.
Inlawlawagna a basar iti obserbasionna ket adda ti nagbaetanda kadagiti sumagmamano a padana nga opisial banag a saan a napintas gapu ta nabutosanda nga agserbi iti publiko.
Naammoan nga adda ti sumagmamano a residente ti maipagarup a pinabainan ti Kapitana kabayatan ti panagdaldalosda.
Kabayatanna, inpakaammo ni Kagawad Raquiño a mamindua a daras laeng dagitoy a mangisaysayangkat ti regular session iti uneg ti maysa a bulan gapu ta no dadduma ket makanselar gapu ta makumikom ti Kapitana.
Maipalagip a ni Kagawad Raquiño ket dati a Kapitan ti Barangay 34-A Gabu ditoy siudad ti Laoag ken ti asawana ket nakabinnabubal ni Kapitana Raquiño iti napalabas nga eleksion.
