LAOAG CITY – Inpasingked ni Barangay Chairwoman Juvilyn Ramos, ti Barangay 30 Sta. Maria ditoy siudad ti Laoag nga ad-adda pay a paigetanda ti panagbantay iti barangayda.
Daytoy ket kalpasan a namin-adun a daras nga adda ti simrek iti carinderia da Mr. Joseph Agullana.
Segun ken ni Kapitana Ramos, idi immuna pay laeng a daras a natakawan ti pamilia Agullana ket dagus a nangiwayatda ti panagtataripnong kaduana dagiti barangay officials ken barangay tanod.
Inbatadna nga inbilinna kadagiti opisial ti barangay nga agbalin nga alerto tapno maipasigurado a natalged met laeng dagiti kabarangayanda.
Inlawlawagna nga adda met ti curfew hours nga ipatpatpatungal iti barangayda no sadinno iti oras ti alas diyes ti rabii ket ditoy a nasken nga awanen ti mabalin nga adda iti ruar ken sumrek a residente malaksid laeng no adda ti emerhensia.
Mainaig iti daytoy, kunana a rinabiida nga agliklikos iti barangay ken no bilang adda dagiti makitada nga agwarang-warang iti dis oras ti rabii ket bagbagaanda dagitoy.
Kabayatanna, inpanamnama ti Kapitana ti ad-adda pay a paigetanda ti panagbantay iti barangayda tapno saanen a maulit pay iti nasao a pasamak.
Immuna iti daytoy, naitaray ti agtatakaw ti maysa nga ipad, maysa a selpon, karton ti sigarilio, kuarta nga agbalor ti tallo a ribu a pisos no sadinno nga adda ti pakabuklan a 30 a ribu a pisos a gatad dagiti natakaw iti maysa a carinderia.
