LAOAG CITY – Saan a ninamnama dagiti barangay officials ti Barangay Paratong iti ili ti Paoay nga iti barangayda ti pakabirukan ti mapukpukaw nga ama.
Segun ken ni Barangay Chairman Ruben Guieb iti nasao a barangay, uppat nga aldaw sakbay ti insidente, kabayatan nga agdaldalusda nga opisial ti barangay iti lugar a nakabirukan ti bangkay ti biktima ket nakaangotda ti nabangsit.
Nupay kasta, kunana a saanda nga inpagarup nga adda ti nagpakamatay a tao iti kayo ti mangga gapu ta adda met ti nakitada a natay a pusa nga asideg iti lugar.
Gapu iti daytoy, inlawlawagna a saanda nga inkankano nga adda ti bangkay a nakabitin iti kayo ti mangga agingga a timmalaw dagitoy apaman a nalpasda a nagdalus.
Mainaig iti daytoy, inpakaammo ni Kapitan Guieb a saan a madlaw nga adda ti natay iti kayo ti mangga gapu ta nasamek ken nasipnget.
Innayonna nga arig saanen a malasin ti biktima gapu ta agruprupsan ti bagi daytoy ken ti tali nga inusarna a nagpakamatay ket baro wenno saan pay a nausar.
Naammoan a daytoyen ti maikadua a daras nga adda ti nagpakamatay iti barangayda.
Maipalagip a nabirukanen a maysan a nalamiis a bangkay ti maysa nga ama a ni Mr. Eric Dennis Agudong, agtawen ti 54, naasawaan ken residente ti Barangay Rioeng ditoy siudad ti Laoag a dua a lawasen a mapukpukaw iti Barangay Paratong iti ili ti Paoay.
