LAOAG CITY – Kalikagum dagiti barangay officials ti Barangay Nalbo ditoy siudad ti Laoag a maiyurnos ti pagayusan ti danum iti Ekhikaia Seafood Restaurant iti mabiit.
Segun ken ni Barangay Kagawad Allan Valdez, ti Barangay Nalbo ditoy siudad ti Laoag, daytoy ti makitkitada a maysa pay a rason no apay nga adda ti nabangsit nga angot nga irekreklamo dagiti sumagmamano a residente iti nasao a barangay.
Inbatadna nga inrekomendar ti lokal a gobierno nga ikkan ti tubo tapno saan a nakalukat ti kanal a pagnaan ti water waste ti nasao a seafood restaurant nga agturong iti septic tank.
Inlawlawagna nga idi bimmisita dagiti Barangay Health Workers ken barangay tanod iti lugar idi kalman ket insigida a ginaburan ti nasao a seafood restaurant dagiti basura a mapapati nga isu ti pagtataudan ti nabangsit nga angot.
Malaksid iti daytoy, kuna ni Kagawad Valdez a maysa pay kadagiti nakitada a mabalin a paggapgapoan ti nabangsit nga angot ket ti pagayusan ti danum a paglablabaanda ken dadduma pay.
Kunana nga adda ti pannakisarsaritada iti akinkukua ti nasao a seafood restaurant ken inpasiguradoda kadakuada a dalusanda dagiti posible a paggapgapoan ti nabangsit nga angot.
Innayonna a daytoyen ti maikatlo a daras nga adda ti naawatda a reklamo kontra iti maseknan a restaurant no sadinno nga agpapada a ti kinabangsit nga angot ti irekreklamoda.
Maipalagip a nakaawat ti reklamo ti Bombo Radyo Laoag babaen ti ipa-Bombo segment manipud kadagiti sumagmamano a residente iti Barangay Nalbo ditoy siudad ti Laoag gapu iti maipagarup a nabangsit a basura ti Ekhikaia Seafood Restaurant.
Immuna iti daytoy, insigida a nagturong dagiti sanitary officers iti nasao a restaurant kalpasan a naireklamo gapu iti maipagarup a nabangsit nga angot.
