LAOAG CITY – Nakalibas ti suspek a nagtakaw ti cellphone a ni Rommel Manuel bayat a nakahospital arrest iti Governor Roque Ablan Senior Memorial Hospital (GRASMH) ditoy ciudad ti Laoag.
Basar ti imbestigasyon, napan laeng nagbanyo iti mangbanbantay iti suspek a ni Patrolman Kevin Villanueva ngem idi agsubli ket awanen ti suspek iti pagiddaan na iti male surgical ward iti nasao nga ospital.
Naamoan a ti nagnaan ni Manuel ket iti akinlikod a fire exit ti baro a building ti nasao nga ospital.
Naudi a nakita ti suspek iti likod ti Holy Spirt Academy a nakaarwat ti red-orange jersey no. 7 ket shorts.
Iti agdama, agtultuloy ti manhunt operation dagiti kameng ti PNP kontra iti suspek.
Maipalagip a natiliw ni Manuel kalpasan a tinakaw na ti cellphone iti ama ti napan na pinasyar a babai iti Barangay 22 ditoy ciudad ti Laoag.
Sakbay a natiliw ti lalaki ket nadalapos na ti frame door ti PNP a nagsagabaan na ti sugat isut gapuna inpan da pay laeng iti nasao nga ospital tapno mapaagasan.
