LAOAG CITY – Nagtalinaed pay laeng iti ospital dagiti biktima iti napasamak a desgrasia iti Brgy. Lang-Ayan iti ili ti Currimao.
Segun ken ni P/Capt. Melvin Soriano, Hepe ti Currimao Municipal Police Station, basar iti inwayatda nga imbestigasion ket rumrummuar a posible a nakaturog ti driver ti kotse a ni Pat. John Mark Dela Cruz y Seguritan, agtawen ti 32 years old, pulis a naidesignar iti HPG Cebu City.
Inbatadna nga iti agdama ket saan pay a nakapagsasarita dagiti agsumbangir a partido maipanggep iti insidente gapu ta manarimaan pay laeng dagitoy nga agpapaimbag iti ospital.
Inlawlawagna nga iyur-urayda ti desision ti pamilia ti biktima a pimmusay a ni Jayson Ross Alonzo y Tabisula, agtawen ti 32, awanan asawa, residente ti Brgy. Quiling Sur iti siudad ti Batac no kalikagumda nga agipila ti reklamo wenno kaso.
Maipalagip a kabayatan a dumaldalyasat ti kotse nga agturong nga agpa-abagatan ket maipagarup nga imm-overtake kadagiti sarsarunnoenna a lugan.
Nupay kasta, saanna a naripar ti kotse ti elf truck a sumungsungad kadakuada a nangitunda ti panagdinnungparda.
