LAOAG CITY – Saanen nga interesado nga agpila ti reklamo ti biktima ti pammagkong iti Barangay Cali ti ili ti Dingras.
Ti biktima ket agtawen ti 37, addaan ti live- in partner idinto a ti suspek ket agtawen ti 43, naasawaan, driver ken agpada dagitoy a residente iti nasao a barangay.
Basar iti Philippine National Police iti ili ti Dingras, nagdesisyon ti biktima a saanen nga agpila ti reklamo gapu ta agkakabagyan da metlaeng iti suspek.
Gapu iti daytoy, winaya-wayaanen a dagus ti Philippine National Police ti suspek iti napasamak a pammagkong.
Maipalagip a kabayatan ti panagin-inom ti biktima ken ti kabsat na ket adda ti saan da a nagkinnaawatan a nangitunda ti panagriri da, rason a napan naganawa ti suspek.
Nupay kasta, maipagarop a saan a nagpaanawa ti suspek rason a nagawid ti suspek ket napan na innala ti knuckle knife iti balayda nga isu metten ti inbagkong na iti akin-kannigid a paset ti siket ti biktima.
Naitaray ti biktima iti Dingras District Hospital ngem naiyakar iti Mariano Marcos Memorial Hospital and Medical Center iti ciudad ti Batac para iti naan-anay a pannakatamingna.
Narekobre met dagiti otoridad ti knuckle knife nga inusar ti suspek iti nakapasamakan ti insidente.
