LAOAG CITY – Inbatad ni Police Capt. Kester Arellano, ti chief of police iti ili ti Sarrat a nagtalinaed ti driver ti ten wheeler truck iti kwerpo ti pulisya kabayatan ti panangiyus-uswat da ti imbestigasyon mainaig iti napasamak a disgrasya iti paset ti Barangay 10, San Miguel iti nasao nga ili a nakatayan ti driver ti motorsiklo.
Nabigbig ti biktima a ni Mark Adrian Amper, agtawen ti 23, residente iti Brgy. 13 San Pedro iti nasao nga ili, idinto a ti driver ti dump truck ket ni Ramon Curameng, agtawen ti 44 ken residente iti San Andres II iti ili ti Bacarra.
Inpakaammo ni Arellano a basar iti inisyal nga imbestigasyon da ket iplasplastar ti biktima ti helmet na kabayatan nga agdaldalyasat nga agpaamyanan idi naipan iti bangir a linya a rason ti pannakadungpar na iti nasabat na a truck.
Gapu iti daytoy, nagsagaba ti biktima ti nakaro a sugat iti ulo na ken naitaray iti Dingras District Hospital ngem pimmusay bayat a matamtamning.
Mainaig iti daytoy, kuna ni Arellano a saan nga accident prone area iti nakapasamakan ti insidente.
Innayon na nga iyur-uray da ti pamilya ti biktima para iti panagsasarita da iti driver ti truck tapno maamoan da no agpila dagitoy ti reklamo wenno saan.
