LAOAG CITY – Natay kabayatan a maag-agasan iti ospital ti maysa a lalaki gapu iti sinagaba na a sugat iti bakrangna kalpasan a pinaltugan ti maysa a kameng ti Philippine National Police ditoy ciudad ti Laoag.
Binigbig ni Brgy. Chairman Juan Carlo Tabios iti Barangay Sta. Rosa ditoy ciudad ti Laoag ti biktima a ni Roderick Sebastian, addaan ti umno a tawen, “mentally challenged” ken residente metlaeng iti nadakamat a barangay.
Inlawlawag a nagturong a dagus iti balay da Sebastian kalpasan nga intawag da kenkuana iti panangkarkaryar na kadagiti nagannak na nga agpada a senior citizen.
Kuna ti kapitan nga adda ti panagdudua na no itawag na iti Philippine National Police ti mapaspasamak gapu ta amangan no ad-adda a ma-trigger ti marikrikna ti biktima.
Nupay kasta, nagpakpakaasi dagiti nagannak ni Sebastian ng itawag ti kapitan iti Philippine National Police ti ar-aramiden ti biktima kadakuada.
Inbatad ni Kapitan Tabios nga iti isasangpet dagiti pulis ket saanda a napakadaaan ni Sebastian a simmungad iti garahe da ken linuguban na ti maysa kadakuada ken nakaiggem daytoy ti kutsilyo no sadinno a ditoy metten a napasamak ti pammaltog.
Mainaig iti daytoy, inrakurak ti kapitan a no kagapgapu ni Sebastian iti rehabilitation ket nasayaat met ti pannakilangen na ngem adda laeng dagiti gundaway nga agbalin nga agresibo kadagiti nagannak na no dumawat ti kwarta a pag-casino na.
Inpakaammo pay ti kapitan nga iti napalabas a lawas ket inikkan dagiti nagannak na ti 130 a ribo a pisos a napan na laeng in-casino.
Innayon na nga itay bigat ket dumawat manen iti agarop 200 a ribo a pisos ti biktima ngem saan a maited dagiti nagannak na isut gapuna a kinarkaryar na dagitoy isut gapuna a nagpatulong da iti Philippine National Police.
Naamoan a dagiti nagannak ti biktima ket adda ti negosyo da partikular iti “pagkaseraan” iti Barangay Buttong ditoy ciudad idinto a ti kakaisuna a kabsat na ket adda idiay Amerika.
Kabayatanna, narekobre iti nakapasamakan ti insidente ti maysa nga empty shell ti caliber 9mm ken ti maysa a kutsilyo.
