LAOAG CITY – Agtultuloy ti naun-uneg nga imbestigasyon dagiti otoridad seknan iti pammaltog a nakasugatan ni Zaldy Gabriel, mannalon, dati nga OFW, naasawaan, dati a drug surrenderee ken residente idiay Barangay Baay iti ciudad ti Batac.
Segun kenni Police Lt. Col. Michael Tuscano, chief of police ti PNP-Batac, am-ammoen da pay laeng dagiti amin nga anggulo ken no anya ti motibo ti nasao a pammaltog.
Inlawlawag na a ti CCTV footage iti balay ti biktima ket adayo iti nakapasamakan ti pammaltog rason a saan da a madeterminar no siasinno dagiti suspek idinto a manarimaan ti panang-review da kadagiti dadduma pay a CCTV footage.
Kinumpirmaran pay ni Tuscano a ti biktima ket nakalibas iti naiyuswat a search operation idi 2017 idiay ili ti Currimao ken dagiti tallo a kakadwa na ket pimmusay.
Mainaig iti daytoy, kuna ni Tuscano a saan da nga ilisi ti posibilidad a dagiti kaso ti biktima ti rason ti nasao a pasamak ken ado pay ti kitkitaen da nga anggulo.
Maipalagip a napasamak ti pammaltog kabayatan ti panagawid ti biktima a nakalugan ti motorsiklo.
Iti agdama ket adda pay laeng iti ospital iti nasao a ciudad ti biktima ken naiget a banbantayan dagiti kameng ti pulisya.
