LAOAG CITY – Nadismaya ni Police Lt. Col. Joseph Baltazar, ti chief of police ti Philippine National Police ditoy ciudad ti Laoag gapo ta agpapan ita ket saan a makikooperar ti biktima ti pammaltog iti Barangay 26 ditoy ciudad.
Segun kenni Baltazar, adda dagiti impormasyon nga ummuna a naala da ngem inbabawi ti biktima a ni Rosefrise Mariano.
Inbatad na a no agtultuloy a saan a makikooperar ti biktima ket pagpirmaen da a mangibagbaga a saanen nga interesado a mangsolbar iti pammaltog tapno saan met a maapektaran ti rekord ti pulisya ti ciudad.
Maipalagip a bayat a nakalugan ti biktima iti lugan na ket pinaltogan dagiti dua a saan pay a nabigbig nga indibidual a nakalugan ti motorsiklo.
Kabayatanna, iti agdama ket adda pay laeng iti Mariano Marcos Memorial Hospital and Medical Center iti ciudad ti Batac ti biktima ken adda met ti kameng ti pulisya a mangbanbantay iti daytoy.
