LAOAG CITY – Pimmusayen ti biktima ti pammaltog a ni Eduardo Honor y Olindan, agtawen ti 49, ken residente iti Brgy. 18, Magnuang iti ciudad ti Batac kabayatan a maag-agasan iti Mariano Marcos Memorial Hospital and Medical Center.
Napasamak ti pammaltog iti paset ti merkado publiko iti nasao a siudad ken asideg laeng iti kuerpo ti pulisya.
Immunan nga inbatad ni Police Major Artemio Clemente, deputy chief of police iti PNP Batac, love triangle ti inisyal a motibo ti pammaltog kalpasan a nakasarita na ti suspek a ni Francisco Saclamitao Jr y Acapuyan, agtawen ti 44, naasawaan, construction worker ken residente iti Brgy. Sta. Rita iti ili ti Paoay.
Segun ken ni Clemente, ginandat ti suspek ti aglibas ngem natiliw met laeng dagiti otoridad.
Manamnama nga ita nga aldaw ket maipila ti reklamo a murder kontra ken ni Saclamitao.
Mainaig iti daytoy, inbaga ni Clemente a sakbay ti pammaltog ket adda ti immuna a panagriri ti biktima ken suspek.
Innayon ti opisyal a nabayagen nga agam-ammo dagiti dua gapu ta nagbalin a trabahador ti biktima ti suspek.
