LAOAG CITY – Agtultuloy ti panagimbestigar dagiti kameng ti Philippine National Police (PNP) mainaig iti pannakapaltog ni Mr. Arthur Fernando iti Barangay Suyo iti ili ti Dingras iti kallabes.
Daytoy ti inbatad ni Police Master Sergeant Kenette Matute, ti imbestigador iti napasamak a pammaltog iti nadakamat a barangay.
Segun ken ni Matute, nakasarita dan ti biktima nga iti agdama ket adda pay laeng iti ospital.
Kuna na a basar iti palawag kadakuada ni Fernando, saanna a malasin ti nangpaltog kenkuana.
Innayon na a basar iti biktima, adda ti bigla lattan a nagsardeng a motorsiklo a nagluganan ti dua nga indibidual ken nagdamag da kenkuana mainaig iti kamatis.
Nupay kasta, kuna ni Fernando a kabayatan a makisarsarita ti maysa kenkuana ket kellaat lattan a pinaltugan isuna ti kadwana kalpasan na ket nagtalapwagawen dagitoy.
Maipalagip a nasugatan ti ulo ni Fernando kalpasan a napaltugan no sadinno a naitaray a dagus iti Governor Roque Ablan Senior Memorial Hospital (GRASMH) ditoy ciudad ti Laoag ngem naiyakar iti Mariano Marcos Memorial Hospital and Medical Center (MMMH&MC) iti ciudad ti Batac.
