LAOAG CITY – Umaboten iti 254 a tattao ti kumpirmado a natay iti napasamak a dua a landslides iti southern Ethiopia.
Agamak dagiti otoridad amangan no ngumato pay ti bilang dagiti pimmusay gapu iti kaado dagiti nagtalinaed a mapukpukaw.
Maipalagip a rinibo a tattao ti naapektaran ti dua a landslides iti Gofa Zone a maibilang kas kagrabean nga insidente idiay Ethiopia.
Ti Ethiopia ti maikadwa a pagilyan iti Africa a kaadoan ti populasyon.
Napasamak ti landslides idi rabii ti domingo agingga iti bigat ti lunes kalpasan ti panagtudtudo na ti napigsa iti kabanbantayan a paset ti Gofa zone.
Inbatad dagiti otoridad nga agtultuloy ti panagbiruk da kadagiti possible a survivor ngem mabalin a manayunan pay ti bilang dagiti pimmusay.
Immunan a kinumpirmaran ti chief administrator ti Goza zone a ni Dagmawi Ayele a karaman kadagiti pimmusay ket nataengan ken ubbing idinto nga adda ti 10 nga indibidual a naisalakan da a sibibiag ken manarimaan a maag-agasan dagitoy iti ospital.
Ti Southern Ethiopia ket maysa laeng kadagiti lugar iti pagilian a masansan a makapasar ti napipigsa a tudo ken layos.
