LAOAG CITY – Maluksaw ni Sangguniang Panlalawigan Member Saul Paulo Lazo, Chairman ti Committee on Education gapu iti napasamak a pannakadangran iti maysa a mangisursuro iti Piddig National High School.
Segun kenkuana, kas mangidadaulo iti nasao a komite ket masapol a maimbestigaran no ania ti napasamak ken no ania ti kasasaad ti mangisursuro ken dagiti estudiante a karaman ti insidente.
Inbatadna nga uray estudiante dagiti nangdangran ket saan a rumbeng a maiyaleng-aleng iti nasao a kaso gapu ta mabalin a makaitunda daytoy ti trauma.
Kunana a makikoordinar daytoy iti Piddig National High School nangruna iti mangisursuro tapno maammoan no ania dagiti banag a mabalin a maitulong kenkuana.
Innayonna a rumbeng a maprotektaran dagiti mangisursuro gapu ta nakaladladingit nga awan ti ordinansa wenno linteg a mabalinda a pagkamangan kadagitoy a pasamak.
Kabayatanna, inpakaammo ti Chairman ti Committee on Education a kalikagumna a mangputar ti ordinansa wenno linteg a mabalin nga adaptaren ti probinsia tapno makatulong a mangsalaknib kadagiti mangisursuro.
Maipalagip a dinangran ti dua nga estudiante nga agkabsat ti maestro a ni Mr. Marlon Agustin.
