LAOAG CITY – Nalukatanen ti Bourbon Street iti New Orleans kalpasan a napaserraan para iti pannakaisayangkat ti imbestigasyon gapu iti nadara a panagatake iti New Year’s Day a nakatayan ti 15 a tattao.
Naipatungpal met ti sumagmamano a minuto a panagulimek iti Sugar Bowl college football game kas paset ti pannakipagladingit iti napasamak.
Karaman kadagiti pimmusay ket ti aspiring nurse, idinto a dinosdosena a sabsabali dagiti nasugatan iti nakaam-ames nga insidente.
Inpalubos ti Federal Bureau of Investigation a malukatanen ti Bourbon Street kalpasan a patien da a ti nangipatungpal iti panagatake a ni Shamsud-Din Jabbar, agtawen ti 42 ken army veteran ket agmaymaysa laeng idi inpatungpal na ti dakes a panggep na.
Kabayatanna, inrakurak ti Federal Bureau of Investigation nga agpapan ita ket awan ti makita da a pakainaigan ti napasamak panagatake iti New Orleans iti panagbettak ti Tesla Cybertruck iti ruwar ti Trump Hotel idiay Las Vegas.
