LAOAG CITY – Manamnama a mapilaan ti kaso a Republic Act No. 10591 wenno ti Comprehensive Firearms and Ammunition Regulation Act ni Barangay Chairman Ruben Dadiz ti Barangay 15 iti ili ti San Nicolas gapu iti panagikotna ti paltog kabayatan ti panagturongna iti maysa a videoke bar iti paset ti Barangay 16, San Marcos iti nasao met laeng nga ili.
Daytoy ti inpakaammo ni P/Capt. Sygman Benigno, Hepe ti San Nicolas Municipal Police Station.
Maipalagip a kabayatan nga agkankanta ti Kapitan ket naipakaammo kenkuana nga adda dagiti kameng ti pulisia a mangiwayat ti “Oplan Bakal” ket boluntario nga inpakaammona kadagiti otoridad nga adda ti paltogna ken kumpleto ti dokumentona a daytoy ket pangsalaknibna laeng iti bagina.
Inpasingkedna a saanna pulos nga in-inruar ti paltogna kabayatan nga adda iti uneg ti videoke bar.
Immuna iti daytoy, nakumpiskar manipud iti nasao a Kapitan ti maysa a Black Belt bag a naglaon iti Gloc .40 caliber pistol ken maysa a magazine nga addaan ti siam a bala ken maysa pay a magazine nga adda iti uneg ti belt bag a naglaon met iti 10 a bala.
Naammoan a ni Kapitan Dadiz ket immuna a nagserbi kas Bise Mayor ken kameng iti konseho iti ili ti San Nicolas.
