LAOAG CITY – Awan ti naipila a reklamo kontra ken ni Brgy. Chairman Ruben Dadiz iti Brgy. 15 iti ili ti San Nicolas gapu iti panagikot na ti paltog kabayatan ti panagturong na iti maysa a videoke bar iti paset ti Barangay 16, San Marcos iti nasao met laeng nga ili.
Inlawlawag na a kalpasan a naipa-medikal iti namindua a daras ken awan ti negatibo a resulta na ket nagsasarita da kada Police Captain Sygman Benigno, ti chief of police iti ili ti San Nicolas, ti abogado na ken dagiti kakadwa na iti Liga ng mga Barangay iti nasao nga ili ket napalubusan metlaeng a nagawid nga awan ti naipila a reklamo kontra kenkuana.
Inadmitir ni Kapitan Dadiz nga adda ti kamali na gapu iti panangiserrek na ti paltogna iti uneg ti videoke bar, ngem ti laeng pilawenna, uray dagiti pada na a kakapitan ket ti panangtrato kenkuana dagiti kameng ti pulisya, aglalo ti pangivideo da kenkuana kabayatan ti pannakaposas na.
Inbatad ni Dadiz a saanna a kwestyunaren ti inaramid dagiti kameng ti pulisya ngem iti koma napinpintas a wagas gapu ta awan met ti naaramid na a krimen.
Inpakaammo na nga addanto ti maangay a taripnong da iti Liga ng mga Barangay tapno pagsasaritaan da no usto ti naaramid kenkuana.
Kuna na a kabayatan nga agkankanta ket naipakaammo kenkuana nga adda dagiti kameng ti pulisya a mangiwayat ti “Oplan Bakal” ket boluntaryo nga inpakaammo na kadagiti otoridad nga adda ti paltog na ken kompleto ti dokumento na, a daytoy ket pangsalaknibna laeng iti bagina.
Inpasingkedna a saanna pulos nga in-inruwar ti paltogna kabayatan nga adda iti uneg ti videoke bar.
Immuna iti daytoy, nakumpiskar manipud iti kapitan ti maysa a Black Belt bag a naglaon iti Gloc .40 caliber pistol ken maysa a magazine nga addaan ti siyam a bala, ken maysa pay a magazine nga adda iti uneg ti belt bag a naglaon met iti 10 a bala.
Ni Kapitan Dadiz ket immuna a nagserbi kas bise mayor ken kameng iti konseho iti ili ti San Nicolas.
