LAOAG CITY – Inpakaammo ni Barangay Chairman Rellie Ramos iti Brgy. Pungto iti ili Bacarra a naminpinsan a nauram ti family house da ken balay ti kabsat na.
Kuna ni Ramos a basar iti palawag ti ipag na, patta-patta a namunganay ti uram iti cellphone a naka-charge iti balay da.
Inbatad na a dita a kellaat a bimtak a nangitunda iti dakkel nga apoy ken nagramram agingga iti family house da.
Mainaig iti daytoy, inpakaammo ni Ramos a nagasat ti pamilya da gapu ta awan ti nadangran kalpasan a nakataray a dagus ti nagannak kenkuana pakairamanan dagiti kakabsat na.
Kuna ni Ramos a malaksid iti naiyadayo na iti uram a motorisklo ken washing machin ket awan iti aniaman a nabati a gamit iti balay ti kabsat na ken family house da.
Immuna iti daytoy, inbatad ni Ramos a dagus met a nagresponde dagiti kameng ti Bureau of Fire Protection iti ili ti Bacarra ken mapatta-patta nga umabot iti 30 minutos sakbay a nasebseban ti uram.
Inpakaammo ni Ramos nga iti agdama ket nagtalinaed iti pagtaengan da dagiti nagannak kenkuana.
