LAOAG CITY – Inbatad ni Barangay Kagawad Amelita Dahoya iti Barangay Acosta iti ciudad ti Batac a nakigtot da iti pannakaarestar ti kabarangayan da a ni Alymer Abdon y del Rosario, agtawen ti 53, naasawaan ken tricycle driver.
Naarestar ni Abdon iti naisayangkat a drug buy-bust operation iti paset ti Barangay Tabug iti ciudad ti Batac.
Nakumpiskar dagiti otoridad ti uppat a sachet a naglaon ti maipagarop a shabu manipod ken ni Abdon, pakairamanan ditoy ti dua a sachet a maibagbaga nga inlako na.
Kinumpirmaran ni Dahoya a drug surrenderee ni Abdon idi 2017 ngem kalpasan a nagturpos iti programa ti gobierno ket naminpinsanen a nagbalbaliw daytoy.
Inlawlawag na a ti laeng panagin-inom na ken panagringringgor na no nabartek ti ammo da nga aramid ni Abdon iti agdama isut gapuna a nakigtot da iti pannakaarestar na.
