LAOAG CITY – Inkalintegan ni Ms. Flordeliza Flojo ti Chief of Nurses iti Dingras District Hospital a nasayaat ti panangtratoda ken ni Mrs. Estelita Agustin, agtawen ti 78 ken residente iti Barangay Elizabeth iti ili ti Dingras kabayatan iti panagturongna iti Dingras District Hospital.
Inbatadna nga awan ti dinakamatna nga awan iti pagdaitda no di ket awan laeng ti available nga anti-rabies vaccine iti nasao nga ospital ken kaaw-awatda laeng ti accreditation a panagbalin kas maysa kadagiti animal bite center ti probinsia ti Dingras District Hospital.
Inlawlawagna a saanda a pinatalaw ti pasiente no di ket inakomodar ken inikkanda iti first aid ken inbaonda a mapan daytoy iti Governor Roque B. Ablan Senior Memorial Hospital para iti naan-anay a pannakatamingna.
Kunana a basar iti assessment-da ket saan a mabalin a madait ti sugat ti maseknan a pasiente ken masapolna laeng a mabakunaan kontra iti anti-rabies.
Innayonna a no maipapan iti panagusar ti ambulansia ket indiayada daytoy iti nasao a pasiente ngem saanna a kinayat.
Maipalagip a maluksaw ti pasiente gapu iti maipagarup a saan a nasayaat a panangtaming ti nasao nga ospital iti sugat iti rupana kalpasan a nakagat daytoy ti walang nga aso.
