LAOAG CITY – Inlawlawag ni Mr. Belmar Garvida, maysa kadagiti innala dagiti kameng ti 77th Infantry Battalion iti Sitio Saliclic iti Barangay Damping iti ili ti Pagudpud ti sibubukel a napasamak kadakuada iti ulitegna a ni alyas Willie.
Segun ken ni Garvida, aldaw ti Lunes idi adda ti innem nga indibidual a nagturong iti lugar no sadinno a ti dua ket ulitegna ken kabsat ni Alyas Willie nga isuda Tomas ken Espino Bangas a taga Ifugao idinto a dagiti uppat ket kameng ti Philippine Amy.
Inbatad na a kadayta a gundaway ket awan ti ulitegna a ni Alyas Willie gapu ta napan nagtrabaho ngem inur-uray da daytoy no sadinno nga agsipngeten idi makasangpet.
Kuna na nga inimbitaran da dagitoy a napan iti Poblacion iti ili ti Pagudpud nga isu ti ayan ti opisina ti 77th Infantry Battalion no sadinno nga ado dagiti sinalsaludsud dagiti militar gapu ta isuna ket dati a kameng ti rebelde a grupo.
Inpakaammo ni Garvida nga adda pay dagiti ladawan nga inpakpakita da kadakuada iti ulitegna no am-ammo da dagitoy ngem negatibo ti nagbalin a sungbat da.
Innayon na a kalpasan iti daytoy ket napan metlaeng intulnog dagiti kameng ti Philippine Army iti balayda ngem saanna pulosen a nakita ken nakasarita ti ulitegna a ni Alyas Willie gapu adda iti uleg ti lugan dagiti militar.
Kabayatanna, kinondenar ni Mr. Audimar Garvida, Chieftain ti ISNAG YAPAYAO BALANGON TRIBAL COUNCIL ti maipagarop a saan a pannakisarita a nasayaat dagiti kameng ti Philippine Army ken nagkedked pay dagitoy nga agpirma iti logbook da.
Inpalgak na a saan da a napilit daytoy nga agpirma iti logbook da kalpasan nga inpetteng da a saan a kasapulan gapu ta dagitoy ket agpapaay ti gobierno.
Mainaig iti daytoy, kinumpirmaran ni Chieftain Garvida a nakontak dan ni Alyas Willie ken inpakaammo na nga addan idiay Ifugao ngem saanna nga ammo ti eksakto a lugar nga ayanna iti agdama.
Immunan a naglikudan ni Lt. Col. Luis Banoey, Commander iti 77th Infantry Battalion a nakabase iti ili ti Vintar ti alegasyon a pwinersa da nga innala ti dua a mannalon iti ili ti Pagudpud.
