LAOAG CITY – Inpetteng ni Sang. Bayan Member Maribel Albano, chairman ti Committee on Health iti ili ti Vintar a mangiyuswat da ti committee hearing seknan iti maipagarop a saan a panangipausar ti Rural Health Unit (RHU) ti ambulansya tapno itaray ti agpasngay nga ina.
Segun kenni Albano, no kasapulan pay a mangaramid manen ti ordinansa mainaig iti pannakausar ti ambulansya ket aramiden na.
Daytoy ket pakaseknan iti isyu a saan a naipausar ti ambulansya a mangitaray ti agpasngay nga ina rason a maipagarop a pimmusay ti maladaga gapo ta naladaw a dimmanon iti ospital iday ciudad ti Batac.
Mainaig iti daytoy, kuna ni Albano nga iti pannakisarita na iti maseknan a pamilya ket nakasagana dagitoy nga agpalawag no mapaayaban da iti hearing.
Inlawlawag na a saan a pabpabasulen ti pamilya ti RHU iti pannakatay ti maladaga ngem kalikagom da laeng a saan to kuman a maulit pay.
Kabayatanna, masdaaw ni Albano no apay a saan nga indiaya dagiti adda iti RHU ti birthing facility ken nakita kuma pay ti sitwasyon ti ina.
Maipalagip a tallo a minutos kalpasan a nakadanun iti ospital ket nagpasngay ti ina ngem pimmusay ti maladaga.
