LAOAG CITY – Manamnama a mangipila ti kaso administratibo ni Police Major Jonevale Maramag, ti chief of police iti ili ti Pasuquin kontra kadagiti police officers a maipagarop a nangdangran kadagiti indibidwal a nagturong iti nasao a kuerpo ti pulisya tapno agreklamo.
Segun kenni Maramag, saan a napintas ti inpakita dagiti tallo a kameng ti pulisya idi parbangon ti Marso 30 gapo ta naiget a maibalbalakad kadagitoy ti panangipatungpal da ti maximum tolerance.
Mainaig iti daytoy, inbatad ni Maramag nga immuna nga adda ti napasamak a komosyon iti Brgy. Davila iti ili ti Pasuquin kalpasan a dinanug ti agnagan ti Rolando Reintegrado alyas Pugar ti dua a residente nga adda iti maysa a minatayan rason a napan da nagresponde ken nakontrol da met a dagus ti sitwasyon.
Kuna na nga immanugot ni alyas Pugar a nagawid ngem kalpasan ti sumagmamano a minutos ket nagsubli daytoy iti minatayan nga addan dagiti kakadwa na tapno agresback.
Gapo iti daytoy, napan nagreport iti kwerpo ti pulisya ti maysa kadagiti nadangran sakbay a nagturong da iti Rural Health Unit iti ili ti Pasuquin.
Kalpasan iti daytoy, simmaruno met a nagturong ni alyas Pugar iti kwerpo ti pulisya kadwa na ti agarop 11 a tattao tapno ireport ti napasamak idinto a rumrumwar nga isuna ti nangirugi ti riri.
Inpalgak ni Maramag a sumungad paylaeng ti grupo ni alyas Pugar iti kwerpo ti pulisya ket saanen a napintas ti isawsawang da a sarita ket makita a maipagarop a nakainom dagitoy ti nasanger.
Inbatad na a ginandat dagiti kameng ti pulisya a kontrolen dagitoy ngem agtultuloy iti panagprobokar da agingga a nadangran dagiti nakaduty ni Pugar ken nagdesisyon da nga ikabil da paylaeng dagitoy iti pagbaludan tapno makontrol ti sitwasyon.
Nupay kasta, kuna ni Maramag nga idi naamoan da a ti maysa kadagitoy ket agtawen ti 17 ket pinaruwar da a dagus idinto a dagiti dadduma ket nagbati iti uneg.
Inpakaammo ni Maramag nga iti kabigatan na ket insigida da a pinarwar dagitoy ken kinasarita da nga urnusen da daytoy a napasamak nga inanamungan met ti grupo.
Patien ni Maramag a prinobokar dagiti kakadwa ni alyas Pugar dagiti kameng ti pulisya no sadinno nga idi napunuwan ken dinangran da dagitoy ket ginundawayan dan ti nagvideo tapno agparang a dagiti pulis ti dakes iti nasao a pasamak.
Kabayatanna, inbatad ni Mr. Ronald Padron, saan a 17 ti tawen ti apoko na a nadangran no di ket agtawen paylaeng ti 14 isut gapu na a kalikagom na a pilaan dagiti pulis ti kaso administratibo.
Inpaganetget na a saan a rumbeng ti kastoy nga aramid dagiti kameng ti nailian a pulisya ken kasapulan ti idadalan da iti naa-anay a panagsanay no kasanu da a kontrolen ti bagbagi da.
Inbatad na a basar kadagiti nakalap da nga impormasyon ti nagan ti pulis a nakita iti video footage a viral iti agdama ket Reygie Ancheta.
Inrakurak met ni Barangay Chairman Jesus Agbalog iti Barangay Davila a ni alyas Pugar, agtawen ti nasurok nga 40, mangngalap ken adviser ti fraternity a Samahang Ilokano, ti nangirugi ti gulo iti minatayan idi sabado.
Istorya ni Barangay Chairman Agbalog nga adda ti napan nagipulong ken ni alyas Pugar nga adda ti agkakabil iti minatayan a pakairamanan ti kabagyan na isut gapuna a nagdardaras a napan iti lugar ket ditoyen a dinanug na ti maysa nga indibidual.
Naamoan a naimatangan ti kabsat ti nadanug ti napasamak isut gapuna a dinanug na met ni Alyas Pugar a nangitunda ti pannakatumba na ken napukawan ti poot.
Kalpasan ti sumagmamano a minutos ket timmakder ni alyas Pugar ket dinanog na ti lalaki nga adda iti sangwanan nga agayayam ti cellphone gapo ta inpagarop na a daytoy ti nangdangran kenkuana. Kabayatanna, nagturong ti newsteam ti Bombo Radyo Laoag iti pagtaengan ni alyas Pugar ken ti menor de edad ngem nagkedked dagitoy a nagkomento mainaig iti nasao a pasamak.
