LAOAG CITY – Kinumpirmaran ti Philippine National Police a nagpositibo iti drug test ti suspect a natiliw ti drug buy bust operation iti Barangay 28 ditoy ciudad ti Laoag.
Naamoan a naipila metten ti kaso a panaglabsing iti Republic Act9165 wenno ti Comprehensive Dangerous Drugs Act of 2002 kontra iti suspek a ni dati a Barangay Chairman Edmond Domingo, residente iti Barangay 56-B Bacsil South ditoy ciudad ti Laoag.
Maipalagip a natiliw ni Domingo kalpasan a maipagarup a naglako ti uppat nga heat sealed transparent plastic sachet a naglaon ti maatap a shabu a nabungon ti papel iti maysa a police poseur-buyer.
Malaksid iti daytoy, nakumpiskar pay manipud iti suspek ti walo nga heat sealed transparent plastic sachet a naglaon ti mapapati a shabu ken ti uppat a ribu a pisos a nausar kas buy-bust money.
Mainaig iti daytoy, inadmitir ti suspek nga agus-usar ti iligal a droga ngem inpetteng na a saan nga aglaklako ti shabu.
Kabayatanna, maibilang ti dati a Kapitan kas Street Level Individual ken nabayagen nga imonmonitor dagiti otoridad.
