LAOAG CITY – Mamati ti dati a Dingras mayor Marynette Gamboa nga adda ti maris pulitika na ti pannakatiliw na gapo ta kada eleksyon ket kanayun met a mairiing ti kaso a murder.
Iti eksklusibo a pannakainuman ti Bombo Radyo Laoag kenni Gamboa, kunan nga iti sumarsaruno nga aldaw ket makarwar to met laeng kalpasan a natiliw idiay Quezon City gapo iti nasao a kaso.
Daytoy ket gapo ta patyen na a ti pannaka-isyu ti warrant of arrest ket saan a naikalintegan ken awan ti legal basis na.
Segun kenni Gamboa, saan a mabain ken saan nga aglemmeng gapo ta ti kaso a nakatiliwan na ket awan a pulos ti pakainaigan na.
Inbatad na a masapol a malpasen ti nasao a kaso tapno maamoan met ni INEC Board President Enrico Cocoy Ruiz no siasinno ti pudno a pnangpapatay iti ama na.
Kabayatanna, plano ti kampo ni Gamboa na a mangipila ti motion to quash tapno ma-lift ti warrant of arrest nga inparuk-at ni Judge Philip Salvador iti RTC Branch 17 idiay ciudad ti Batac gapo iti kaso a murder.
Inlawlawag ni Gamboa a saan a motion to post bail ti ipila da gapo ta no aramiden da daytoy nga addang ket arig na mamati a ti warrant ket arrest ket agpayso.
Inpetteng na a saan na a patyen ti legality ti pannakaiparuk-at ti warrant of arrest.
Patyen ni Gamboa nga isuna ti mangabak iti nasao a kaso ken nagyaman kadagiti amin a sumupsuporta kenkuana.
Binalakadan na pay ni Ruiz a sayaaten na ti addang na gapo ta patyen na a mabalin a dusaen daytoy ti Diyos.
Namunganay ti kaso kontra kenni Gamboa iti pannakatay ni NEC Board President Lorenzo Rey Ruiz idi Setyembre 4, 2009 bayat nga adda iti INEC Substation idiay Lang-ayan iti ili ti Currimao.
