LAOAG CITY – Inlawlawag ni Atty. Gerard Gallardo, Provincial Director ti Department of the Interior and Local Government ditoy probinsia a posible a mapilaan ni dati a Brgy. Chairman Elviro Agoo iti Brgy. Davila iti ili ti Pasuquin no mapaneknekan nga isuna ti maipagarup a nagpasugal iti uneg mismo ti Barangay Hall.
Segun kenkuana, nupay saan a sumango isuna ti disciplinary action gapu ta saan met daytoyen nga opisial wenno adda ti akemna iti aniaman a posision iti gobierno ket mabalin isuna a mapilaan ti kaso gapu iti panaglabsingna iti Presidential Decree 1602 wenno ti Illegal Gambling Law kas maysa a private individual.
Inbatadna a saan a nainkalintegan a pagay-ayaman ti panagsusugal iti uneg ti Barangya Hall gapu ta maikanniwas daytoy iti paglintegan.
Mainaig iti daytoy, kuna ni Atty. Gallardo a kalikagumda a makikoordinar iti Department of the Interior and Local Government iti ili ti Pasuquin tapno maammoan ti pakabuklan a napasamak iti nasao nga isyu.
Kabayatanna, naammoan a no mapaneknekan nga inpabus-oy dagiti opisial ti barangay a maiwayat ti panagsusugal iti uneg ti Barangay Hall ket adda ti maiyannatop a pannusa kadakuada.
Immuna iti daytoy, nagkamang ditoy Bombo Radyo Laoag da Barangay Health Workers Femia Villanueva ken Fae Benito pakairamanan ni Barangay Tanod Loreto Paet Jr. iti Brgy. Davila iti ili ti Pasuquin kalpasan a maipagarup a nagpasugal ni dati a Brgy. Chairman Elviro Agoo iti uneg mismo ti Barangay Hall-da.
