LAOAG CITY – Inpetteng ni dati a Konsehal Melvin dela Cuesta ditoy ciudad ti Laoag a nagpatulong kenkuana ti balasitang gapu ta maipagarop a tinungpa ti lola na a ni Mrs. Marilyn Calison iti Barangay Calayab ditoy ciudad.
Inbatad ni dela Cuesta a ti palawag ti balasitang no apay a tinungpa ti lola na ket gapu laeng iti cellphone.
Inlawlawag ni dela Cuesta nga adon dagiti natultulungan da isut gapuna a tinulungan da ti balasitang babaen ti panang-kustodyar da.
Nupay kasta, inkalintegan ti dati a konsehal a mismo a ti balasitang ti immasideg kadakuada ken saanna nga ammo no nagpakada wenno saan iti lola na.
Kuna na a kabayatan ti kaadda na iti baybay kadwa na ti lola ti balasitang ket napan nagbiruk ti pagloadan ti driver na no sadinno a nakita na ti menor de edad nga adda iti ruwar ti balay da Calison bitbit nan dagiti gamitna.
Gapu iti daytoy, sinardengan ken inlugan ti driver ni dela Cuesta ti balasitang ngem inadmitir ti dati a konsehal a saanna nga inpakaammo kenni Calison nga adda ti apoko na iti lugan gapu ta kayat na a protehiran daytoy manipod iti possible a panangdangran manen ti lola na.
Segun ken ni dela Cuesta, ti balasitang ket nagtalinaed iti dua a rabii ken tallo nga aldaw iti San Valley Beach Resort ken saan a kayat ti maseknan ti agpa-blotter wenno naikabil iti Department of Social Welfare and Development no sadinno a ti laeng kalikagom na iti dayta a gundaway ket ti makasublin iti Metro Manila.
Inadmitir pay ni dela Cuesta nga idi napan da Calison kadwa na dagiti opisyal ti barangay, ken dagiti kameng ti pulisya iti ayan da partikular iti ket inlibak na idi damo a kadwa da ti balasitang iti nadakamat a resort gapu ta isu ti bilin ti nasao a menor de edad.
Nupay kasta, napanunot ni dela Cuesta a nasaysayaat no ipakaammo na kadagiti maseknan nga adda ti balasitang iti kustodyar na.
Inpakaammo pay ni dela Cuesta a ti kayat dagiti nagannak ti balasitang ket isuna ti temporaryo a mangkustodyar ken mapan mangitulnod iti Metro Manila ngem saan nga immanamong dagiti maseknan.
Iti agdama, ti nasao a balasitang ket adddan idiay Metro Manila.
