LAOAG CITY – Agpada nga adda ti drug watchlist ti Philippine National Police (PNP) dagiti biktima ti napasamak a pammaltog ditoy ciudad ti Laoag idi kalman.
Dagitoy ket da Nathaniel Ruben Taylan II, taga Dingras, Ilocos Norte ngem agdama nga agnanaed ti barangay 13 iti ciudad ti Laoag ken ni Joefrey Blanes, agtawen ti 45, naasawaan ken residente met ti Barangay 12 ti met laeng ciudad ti Laoag.
Ni Taylan ket dati pay a kameng ti konseho idiay ili ti Dingras.
Maipalagip nga idi kalman bayat nga aggapo dagiti biktima ti pagpapallutan idiay ili ti Vintar ket kellaat lattan a pinaltu-paltugan dagiti saan pay a nabigbig a suspek.
Mainaig ti daytoy, kinumpirmaran ni Police Supt. Edwin Balles, hepe ti PNP-Laoag a nakarekobre dagiti otoridad ti uppat nga slug ken siyam a kapsula ti 9mm pistol ti nakapasamakan ti krimen.
Kuna na nga adda dagiti testigo nga inimbitaran da ita nga aldaw tapno maalaan da ida ti statement.
Segun pay ken ni Balles, itultuloy da ti agimbestigar ken maysa nga anggulo a kitaen da ket pakaseknan ti illegal a droga.
Innayon ni Balles nga irebisar da dagiti CCTV a possible a nakaimuntar ti lugar.
