LAOAG CITY – Saan pay a makaited ti komento ti Dept. of Education (DepEd) ditoy probinsya seknan iti napasamak a panagkakabil dagiti estudyante iti Bacarra National Comprehensive High School.
Daytoy ti inbatad ni Dr. Lloyd Rosqueta, Chief ti Schools Governance Operations Division iti DepEd-Ilocos Norte.
Segun kenni Rosqueta, kas proseso ket masapol nga adda ti pormal a report ti Principal mainaig iti nasao nga insidente tapno adda ti pangrugyan da nga agimbestigar wenno mangammo no anya ti napasamak.
Inlawlawag na a dagiti insidente a kas iti napasamak kadagiti estudyante ket ummuna a matratar iti pagadalan ken no saan a masolbar ket maipadanon iti division office.
Kabayatanna, kunana a no kastoy ti mapaspasamak ket masapol a mapaayaban dagiti estudyante a karaman tapno mapagsasaritaan.
