LAOAG CITY – Nangipaay ti Department of Education (DepEd) ti psychological first aid ken psychosocial support para kadagiti estudyante, pamilya ken school personnel a naapektaran ti pammaltog iti Ateneo de Zamboanga University Junior High School itay bigat, Agosto 18.
Segun iti opisyal a rakurak ti Department of Education, makikokoordinar da kadagiti mental health partners tapno maipaayan ti kasapulan a suporta dagiti naapektaran ti insidente.
Nagpanawagan met ti DepEd iti publiko a liklikan ti agiwaras ti saan a beripikado nga impormasyon ken saan nga iwaras ti sensitibo a ladawan, video wenno detalye mainaig ti insidente, aglalo ket adda dagiti menor de edad a karaman.
Immuna iti daytoy, dua nga estudyante ti kumpirmado a natay iti pammaltog, karaman ti Grade 9 student a maitudtudo a gunman ken maysa a Grade 10 student.
Agtultuloy ti imbestigasyon dagiti otoridad iti insidente iti napasamak a pammaltog.
