LAOAG CITY – Saan pay a makaipaay ti komento ni Doctor Joan Corpuz, DepEd Supt. ditoy probinsya mainaig iti gandat a panagpakamatay ti maysa nga estudyante iti Integrated San Marcelino High School iti ili ti Dingras.
Daytoy ket kalpasan a maipagarop a pinagsasawan ti mestra na a ni Luvenia Arcangel, Grade 8 Adviser ti nasao a pagadalan.
Inbatad ni Corpuz a responsibilidad ti principal ti nasao a pagadalan a ni Teresita Malana ti mangireport iti opisina no adda ti kastoy a mapasamak.
Inpetteng na a no saan nga agreport ti principal ket adda ti malabsing na a paglintegan.
Inkari ni Corpuz nga apaman nga adda ti maawat na a report ket paayaban na a dagus iti opisina na ti principal ken ti mestra a mairekreklamo.
Maipalagip a maipagrup a pinagsasaoan ni Arcangel ti saanen a nainaganan nga estudyante kalpasan a nakita na daytoy nga agsel-cellphone kabayatan a nakabreak dagitoy.
Gapu iti daytoy, nagawid ti estudyante iti balay da nga agsangsangit ken agtagtagerger, kalpasan na ket maipagarop a nagtumar ti agarop 20 a tableta nga agas.
