LAOAG CITY – Inbatad ni Doctor Francis Dacuycuy, dati a nangidaulo iti Laoag City General Hospital (LCGH) ditoy ciudad ti Laoag a tallo a banag dagiti patien na a makaigapu iti pannakalugi ti nasao nga ospital sipud idi 2014 agingga idi 2018.
Dagitoy ket ti pannakaipaay ti diskwento kadagiti pasyente kas kiddaw dagiti politiko, empleado ti gobierno ken dadduma pay, kaadda dagiti nag-promissory note a saan a nagsublin a nagbayad ken umabot ti 20 milyon a pisos ti saan a mait-ited ti philhealth iti nasao nga ospital iti kada tawen.
Iti eksklusibo nga interview ti Bombo Radyo Laoag ken ni Dacuycuy, inbatad na a dagiti maik-ikkan ti diskwento ket kiddaw wenno pammilin manipod iti opisina ti mayor a masapol nga iyimplementar na.
Nupay kasta, inpasingked ni Dacuycuy nga awan ti ammo na iti maibagbaga nga anomalya iti nasao nga ospital kadagiti naglabas a tawen. Kabayatanna, kinumpirmaran met ti saanen a nagpabigbig nga opisyal iti LCGH a ti diskwento nga inpaay ti nasao nga ospital iti napalabas nga administrasyon ket manipod 20 agingga iti 100 a porsiento.
Segun pay iti rekord, ti kangatoan a naited a diskwento iti saanen a masinunuo a pasyente ket umabot ti 36,610 wenno 100 a porsiento. Naduktalan pay ti Bombo Radyo nga adda ti naummong a diskwento a kiddaw dagiti opisyal ti barangay nga umabot iti 2 a milyon a pisos.
Awan met ti maipakita a legal a pagibasaran ti LCGH no ordinansa wenno national law ti 30 agingga iti 100 a porsiento a diskwento nga in-inted da.
