LAOAG CITY – Inpakaammo ni P/Lt. Col. Adrian Gayuchan, Hepe ti Batac City Police Station nga addan ti panagsasarita ti nangiturong ti closed van ken iti pamilia ti biktima a nadungparna.
Segun kenkuana, inpasigurado ti nangiturong ti closed van a mangipaay daytoy ti tulong pinansial ken no aniaman ti kasapulan ti pamilia a nagpasina.
Inbatadna a ti biktima ket agtawen ti 60, karpintero, agdama nga agtrabtrabaho da iti Barangay Bungon ngem residente iti ili ti San Nicolas idinto a ti driver ti closed van ket agtawen ti 33 ken residente met iti ili ti San Nicolas.
Inlawlawagna a basar iti inwayatda nga imbestigasion, kabayatan a dumaldalyasat ti closed van nga agturong nga agpa-amianan ket kellaat a bimmallasiw ti biktima a nangitunda ti pannakadungparna ti closed van ken naipasirok pay daytoy iti nasao a lugan.
Kunana a ti palawag kadakuada ti driver ti closed van ket saanna a dagus a nakita ti biktima gapu ta nakapsot ti silaw iti kalsada.
Inpasingked met ni Gayuchan a saan a nabartek ti driver ti closed van idi napasamak ti desgrasia.
Iti agdama, nagtalinaed ti driver ti closed van iti kuerpo ti pulisia iti siudad ti Batac.
Maipalagip a natay ti senior citizen kalpasan a naatalan ti closed van iti national highway, bisinidad iti Barangay Bungon iti siudad ti Batac.
