LAOAG CITY – Inpakaammo ni P/Capt. Elison Pasamonte, Hepe ti Badoc Municipal Police Station a natiliwdan dagiti driver ti dua a closed van a nagkarga ti 14 a baboy a naabandonar iti paset ti Barangay Turod iti ili ti Badoc.
Nupay kasta, saanen a nangipaay pay ti naan-anay a detalye iti pakabigbigan dagiti maseknan.
Inbatadna nga inpaimada metten iti Provincial Veterinary Office no ania dagiti mabalin a maipila a reklamo kontra kadagitoy.
Maipalagip a nakaawat ti Philippine National Police ti report manipud iti 2nd Provincial Mobile Force Company seknan iti nakita a naabandonar a dua a behikulo iti paset ti Sitio Catanubungan iti Barangay Turod iti nasao nga ili.
Immuna iti daytoy, iti panagresponde dagiti kameng ti Philippine National Police ket sinukimatda ti dua a closed van a dagitoy ket addaan ti plate number nga XMX322 ken UTH262 a nakaikargaan ti 14 a baboy.
