LAOAG CITY – Winaya-wayaanen ti Philippine National Police iti ili ti Bacarra ti driver ti dump truck a ni Erwin De la Cruz y Mata, agtawen ti 39, naasawaan ken residente ti Brgy. Manayon iti ili ti Bangui.
Daytoy ket kalpasan a nangngudon ti reglementary period a saan a nakapagtinnulag a nasayaat ti driver ti dump truck ken ti pamilya ti pimmusay a nakamotorsiklo a ni Honeylyn Gaspar y Sevilleja, agtawen ti 32, awanan asawa ken residente ti Brgy. Ulayos, Catucdan, Cabugao, Ilocos Sur.
Maipalagip a kabayatan a dumaldalyasat dagiti dua a lugan nga agpada nga agpa-abagatan ket nag-overtake ti dump truck iti sarsarunnoenna a motorsiklo a nangitunda ti pannakaatal ti nasao a biktima.
Gapu iti napasamak ket nagsagaba ti nakana a sugat iti ulo ti nakamotorsiklo idinto a saan a naan-ano ti nangiturong ti dump truck.
Naitaray ti biktima iti Bacarra Medical Hospital ngem naideklarar a dead on arrival babaen ti attending physician a ni Dr. Marianne Shem Caraang.
