LAOAG CITY – Nagtalinaed iti Philippine National Police ti driver ti Florida bus a nakadinnungpar ti maysa a pick-up a nakatayan ti driver na iti Barangay Dilavo iti ili ti Pasuquin.
Nabigbig ti pimmusay a driver ti pick-up a ni Mr. Noel Modesto y Calivoso, Head Nurse iti Rurak Health Unit iti ili ti Bangui ken residente metlaeng iti nadakamat nga ili idinto a ti driver ti bus ket ni Louie Sardeng y Ramos, agtawen ti 51, naasawaan ken residente iti Barangay Tanggat Sur, Claveria, Cagayan.
Segun ken ni Police Major Jonevale Maramag, ti chief of police iti nasao nga ili, iyur-uray da ti panagsarita ti driver ti bus ken ti pamilya ti biktima tapno maamoan no adda ti maipursige a kaso wenno awan.
Maipalagip a napasamak ti insidente iti kurbaan a paset ti kalsada kalpasan a nagovertake ti pick-up iti maysa bagun a nagresulta iti panagdinnungpar da iti bus nga addaan ti 43 a pasahero ken agturong koma daytoy iti ciudad ti Baguio manipod iti ciudad ti Tuguegarao.
Gapo iti daytoy, nagsagaba ti nakana a sugat ti driver ti pick-up ken naitaray iti Gov. Roque Ablan Sr. Memorial Hospital ditoy ciudad ti Laoag ngem natay bayat a maag-agasan idinto a 13 kadagiti pasahero ti bus ket naitaray iti Municipal Health Office iti ili ti Pasuquin kalpasan a nadangran met dagitoy.
Immunan nga inlawlawag ti driver ti bus nga adayo da pay ti pick-up idi nagovertake ngem nasdaaw gapo ta saan a dagus a nagsubli iti linya na agingga a napasamak ti disgrasya.
