LAOAG CITY – Napilaanen ti kaso a reckless imprudence resulting to multiple homicide and damage to property ti driver ti Isuzu forward a nakadinnungpar ti maysa a motorsiklo a nagluganan dagiti dua nga agpagayam iti paset ti Manila North Road iti Barangay 3, San Ildefonso iti ili ti San Nicolas.
Daytoy ti inpakaammo ni Police Capt. Randy Damo, ti chief of police iti ili ti San Nicolas.
Immunan nga inrakurak ni Damo a dagiti biktima a nakalugan ti motorsiklo a Cyan Yamaha Mio I 125 ket agpada a residente iti ili ti Solsona ngem agtrabtrabahoda iti maysa a construction site iti ili ti Sarrat idinto a ti nangiturong ti Isuzu Forward ket agtawen ti 48, naasawaan ken residente ti Barangay Igsoro, Bugasing, Antique.
Iti imbestigasyon ti Philippine National Police, agpapaabagatan ti Isuzu Forward idi bigla a kimmurus a nagpalaud ti motorsiklo a nagluganan dagiti dua nga agpagayam.
Gapu iti daytoy kinapigsa ti impact ti napasamak a disgrasya ket naipurwak dagiti nakalugan iti motorsiklo iti sumagmamano a metro manipud iti nakapasamakan ti insidente.
Naitaray dagiti biktima iti Mariano Marcos Memorial Hospital and Medical Center iti siudad ti Batac ngem pimmusay dagitoy kabayatan a maag-agasan da idinto a saan a naan-ano ti nangiturong ti Isuzu Forward ken dagiti kakaduana a nakalugan.
Naammoan a saan a nakasuot ti protective helmet ken high visibility vest dagiti dua a biktima idi napasamak ti desgrasia.
Iti agdama, nagtalinaed paylaeng ti driver ti Isuzu forward iti Philippine National Police iti ili ti San Nicolas.
