LAOAG CITY – Naiyakaren iti Mariano Marcos Memorial Hospital and Medical Center iti siudad ti Batac ti driver ti kotse kalpasan a naaksidente iti Brgy.5 ditoy siudad ti Laoag.
Daytoy ti kinumpirmaran ni P/Master Sergeant Artemio Magaoay iti Traffic Division ti Philippine National Police (PNP) ditoy siudad.
Segun kenni Magaoay, naiyakaren ti driver iti ospital gapu kadagiti sugat a sinagaba ti bagi na ken natukkol ti paragpagna.
Mainaig iti daytoy, kinuna ni Magaoay a dagiti naka lugan iti pick up ket dagus a nakaruar iti balay pagagasan pakairamana ti kadua ti driver iti nasao a kotse.
Maipalagip , a nagdinnungpar ti maysa a kotse ken pick up iti Brgy. 5 ditoy siudad ti Laoag. Nabigbig ti driver ti kotse nga agtawen iti 27, maysa a pulis a nakadestino iti 2nd Provincial Mobile Force Company ken residente ti Brgy. Mandaloque iti ili ti Dingras idinto a nabigbig ti kaduana nga agtawen iti 17, babai ken residente ti Brgy. 23 iti ili ti Bacarra.
Nabigbig met ti nangiturong ti pick up nga agtawen iti 43 ken residente Buanga iti ili ti Pinili ken adda ti walo a kakaduana a nakalugan iti pick up. Basar iti Laoag City Police Station, kabayatan a dumaldayasat ti kotse nga agpa-daya ket naglikko daytoy a nangitunda ti panagdinnungparda iti pick up nga agpa-abagatan.
Gapu iti daytoy, nagsagaba ti sugat iti nagduduma a paset ti bagi dagiti maseknan a nakalugan kadagiti dua a lugan.
Naammoan a nakaro a nadadael dagiti dua a lugan gapu iti kinapigsa ti impact ti desgrasia.
